В. Солодов: Тывылг’о танвэтгыӈгиӈо катгогиӈыкъет айгытӄываятэн Камчаткак еллайкэ законодательный этгиӈык

27.04.2022 12:18:37 (GMT+12)

В. Солодов: Тывылг’о танвэтгыӈгиӈо катгогиӈыкъет айгытӄываятэн Камчаткак еллайкэ законодательный этгиӈык
В’уткекьйит иви инэллэчг’ын регионык Законодательный умэкэтык крайик. Тыӈивылг’э ваятэн нанвэтгыльг’ав’нав’ инэгэю Уставэтыӈ Камчатский крайик. Пылиткома танвэтгыӈгиӈо В. Солодов эвыӈ, ыннею инэгэю келлаӈ тит йиплепавык ымыӈ ею законодательный этгиӈэпыӈ федеральный законодательствайпыӈ. В. Солодовынак тывынэн омакальг’атылг’ыйикыӈ Законодательный этгиӈыкъет айгытӄываятэн, юнэтылг’ин крайик.

«Законодательный этгиӈо, тит вийиӈык катгогиӈо айгытӄываятэн, лиги нэелӈикынэв’. Катгогиӈо айгытӄываятэн еллайкэ тит тывык законодательный танвэтгыӈгиӈо.
Инэллэчг’э ятвэкынэн в’аӈлагиӈо айгытӄываятэн тыӈэвылг’ыйикын ваятэн. Гыммо тыччочымавык в’уткекъйит вэтатык. То ӈэвэӄ ымоӈ омакаӈ в’отэныӈӄо мыччавэталлайкэ танвэтгыӈгиӈо айгытӄываятэн наявийиӈикынав’.

ӄайлим тыӈивылг’у ваятэн вэталлай тит йинтоӈвавык инэгэю Уставэтыӈ крайик»,-эвыӈ В. Солодов.

Тойуставыӈӄо инэллэчг’ын нэкуйичиӈын 5 гэвэгиӈэтыӈ то ятвайкэ инэллэчг’у ӄэй тэг’и гэвэгиӈо. То опта эмэлкэ йинэллэйкынин Инэллэиччетык крайик. Ынан ятвэкынэн миӈкые валг’ын инэллэиччет ныг’итики. ӈывома итык инэллэчг’у якалэйилӈатэкынэн присяган.

Уставык гакалилин тойчыг’ычг’энаӈ государственный эналлагиӈын крайик. Законодательный умэкэт- ӄонпыӈ итылг’ын законодательный иччет государственный эналлагиӈык; инэллэчг’ын- ынан гычгол валг’ын инэллэчг’ын; инэллэиччет крайик- ӄонпыӈ вэтатылг’ын инэллэиччет; куччев’ инэллэиччету крайик- администрациян инэллэчг’ин крайик, министерствав’, агентствав’, то ӄуччев’ вэтатъиччету.

В’уткекьйит панэнатвылай эначгыпавылг’о инэллэчг’ин то Инэллэиччетин Камчатский крайик.

Эняннимэв’нэн С. Тынанто

Делитесь новостями Камчатки
в социальных сетях: