Кымг’укэтог’ылв’ыйикъет «Калэйтыякэнав’ гэвэгиӈо», «Ейгунычвын»!

Мыкыӈ 30 гэвэгиӈо Корякский округык г’уеви ымыӈ микнэк эӈг’элу лыӈылг’ын мылав’ъиччет, 15 гэвэгиӈо китыӈ государственный иччет Камчатский крайик.

Кымг’укэтог’ылв’ыйикъет инэллэчг’у КГБУКК «ЦДМТ «Калэйтыякэнав’ гэвэгиӈо» копоздравлянӈынэн Валентинанак Броневич.

Эӈг’элу лыӈылг’ытуйи Светлана Петровна то Сергей Рудольфович! Номг’ав’ тыкопоздравляллаӈтык кымг’укэтог’ылв’ыйикъет КГБУКК «ЦДМТ «Калэйтыякэнав гэвэгиӈо» то митг’айин иччет «Ейгунычвын»! Туйик гымвэтгиӈа, то метгиӈа, эӈг’элу лыӈма ымыӈ ею чининваяткэнав’, 1994 гивик Корякский округык г’уеви кымиӈычгин то тойваятэн мылавъиччет «Калэйтыякэнав’ гэвэгиӈо» («Ейгунычвын»), то еӄӄэ ныг’эли государственный иччету. Мыкыӈ тысячан кымиӈа то туйчыг’э Паланкэнав’ нэлэг’ун йиг’эт ёнатгиӈэтыӈ: эӈг’элу нэкулӈыӈын искусстван, этонотан, нэнгыюлэв’нэв’ томгылг’атынвыӈ, намкумг’ыг’ав’ гитэӈ яйичг’эн этгиӈо!

15 гэвэгиӈо иччетин «Калэйтыякэнав’ гэвэгиӈо»- ыннин опта кымг’укэтог’ылв’ий краен!

Эчги уйӈэ ятан иткэ мылвъиччету, ымыӈ ӈывой итык мыквэтылг’ын этно- культурный гынуну. Тыкивыӈ тойкыӈ Светлана Петровна то Сергей Рудольфович, то ымыӈ кымэӈыйикыӈ, меӈию комлав’лаӈ мылав’ъиччетык нитикынэв’ нытуйӄинэв’ эналватгиӈо, тит амъел митг’у то эӈг’элу нанг’ылӈылайкынэтоё юнэттумгэ то ымоӈ микнэк тую мэлу наколӈылаӈтык! Этг’ылкэ, нымэлӄинэв’ вэтгиӈо то ӈывогиӈо!

Эняннимэв’нэн С. Тынанто