Виткукин нывэтгыӄэн еӈальг’атгиӈын ӈывой итык Петропавловскаӈӄо- Камчаткакен Апегейтыӈ

В. Солодов то инэллэчг’ын Пенжинский муниципальный районык А. Болотнов танвэтгыӈги миӈкые йиплэпавык район.

Натвынав’ яноткенав’ пыӈлов’, меӈию мельинг’э ӈывок тэйкык ынан ыявак валг’ык районык.

«Лайвыма ӈанэн районэтыӈ, ӈынвыӄ ымыӈ ею мытвэтгыльг’аннав’. Ымыӈ транспортакенав’ этгиӈо, пыӈлов’ энанмалавав’гиӈэпыӈ. Чеймык валг’ык гэвэгиӈык наяӈвоӈнав’ йинтыватык ӈыёӄ вано: Апигик, Аяӈкик, Яёлкагиӈык. ӈэвэӄ инг’э йиг’ояв’лаӈ инэнмэлэв’вано, еллайкэ нымэлӄинэв’ в’эннятгиӈо инэнмэлэвык ёнатылг’ыйикыӈ Пенжинский районык»,- иви В. Солодов.

Тывыма транспортакенав’ этгиӈо А. Болотнов эвыӈ, 29 тэнмыталойиг’илгык итти виткукин еӈальг’атгиӈын Петропавловскаӈӄо- Камчаткакен Апегэйтыӈ, наяван ыннэн г’ылв’ий. То еӄӄэ ӄутин г’ылв’ыйик кымг’ылэлай Апегэӈӄо Петропавловск- Камчаткакен. Ив’ке ыннинг’ан валг’ын рейс ӄонпыӈ алак ныг’итики.

То А. Болотнов эвыӈ, тит ӈывок йинтыватык ФАПо Аяӈкик то Яёлкагиӈык эмет ганчоччымав’лэнав’ нучельӄу, эмет ыччу келлаӈ КГКУ «Служба заказчика Минстроя Камчатского края». Анок наяӈвоӈнав’ аукционо.

Пыӈыл тит ныг’итики нывэтгыӄэн еӈальг’атгиӈын Петропавловскаӈӄо- Камчаткакен Апегейтыӈ натвыгаг’ын В. Солодовынаӈ лайвыма районыӈӄо тэнмыталойиг’илгык 2022 г.

Итти тайкыёлӄыл министерстваӈ транспортакен то тайиг’эткэн крайик, ыннин еӈальг’атгиӈын ӄонпыӈ етэйкикынин АО «Камчаткакен авиаиччетэ»

То опта тит ныплэпг’ав’ нэлэйвикынэв’ ӄутин в’ойвэтыӈ районык явэтатэкэ лэйвинэӈ «Барс» энайлятылг’ын «Нептун-23», меӈин яӈвоӈ вэтатык ӈывома навигациян 2022 г. ӄонпыӈ еллайкэ рейсав’ Апигин- Кольпач. Явэтатэкэ ГУП «Камчаттрансфлот».

Ынняӄ в’отэнгэвэӈӄо Кольпачыӈӄо Яёлкагиӈэтыӈ елэйвики вездеход «Арктика- ЗДК».

В’уткекьйит панэнатвылай эначгыпавылг’о инэллэчг’ин то Инэллэиччетин Камчатский крайик.

Эняннимэв’нэн С. Тынанто